Siç e kemi mësuar të gjithë tashmë nga reklamat e shumta që po bëhen në ekran prej javësh, Ermal Mamaqi do të rikthehet fuqishëm në ekranin e TV “Klan”, çdo të shtunë. Edhe pse ai ishte shumë i suksesshëm në programin e tij në Digitalb “6 ditë pa Ermalin”, tani është në një situatë që i duhet të jetë akoma më interesant në daljet e tij. Arsyeja e parë është se emisioni i tij do të vijojë, pra nuk do të mbyllet dhe atë do ta drejtojë një emër gjithashtu i njohur i humorit, Elvis Pupa, si dhe në atë fashë orari, në ekrane të tjera ka programe shumë të mira, si programi i Arbana Osmanit “Dua të të bëj të lumtur”, i cili thuhet se do të jetë shumë i bukur, por dhe “Al Pazari” në Vizion Plus, i drejtuar nga Agron Llakaj, i cili dihet që ka bërë shumë publik për vete, sepse ka kaq vite në ekran dhe normalisht ata vijojnë ta ndjekin kudo ku ai të shkojë. Prandaj dhe Ermali duket se i ka dhënë shumë programit të tij të pagë zuar “Xing me Ermalin”, për ta bërë atë të pakonkurrueshëm. Si fillim ai duket se ka prenotuar të gjithë figurat më interesante të ekranit, disa prej të cilëve tashmë të konfirmuar, si vëllezërit korçarë Stefi dhe Endri, të cilët dihet që kanë shumë humor, por edhe Bleona Qereti, e cila do të shfaqet për herë të dytë tek emisioni i Ermalit. Por të enjten e javës që shkoi, paparaci i “Panorama” e gjeti Ermalin duke dalë nga dera e Kuvendit, i shoqëruar nga këshilltari për mediat i Ilir Metës, Lorenc Vangjeli. Nuk dihet se kë ka shkuar të takojë ai, mbase mysafiri tjetër i rëndësishëm nga politika pas Sali Berishës, mund të jetë Ilir Meta. Mbetet ta shohim!
