Është gjithnjë bukur të marrësh dhurata dhe urime për ditëlindjen. Por ndryshe nga vitet e tjera, këtë vit, Devis Samarxhi së bashku me dhuratat, urimet e prindërve dhe miqve, i është shtuar edhe dhurata speciale e idhullit të tij. Si një gjeni në matematikë që është, Devisi ka plotësisht të merituara dhe urimet nga një tjetër gjeni, ai i futbollit. Flasim për Lorik Canën, i cili i ka dërguar dhuratën e tij Devisit, një autograf në topin e Kombëtares. Fituesi i Olimpiadës së Matematikës do ta mbajë mend gjatë ditëlindjen e tij të 13, më 24 janar, pasi ish-kapiteni i ka dedikuar urimet më të mira për suksese të mëtejshme. Futbolli është një nga dashuritë më të mëdha të 13-vjeçarit, ndaj dhe kjo surprizë do t’i shërbejë për më shumë motivim dhe pasion. Ne nuk na mbetet gjë tjetër veçse t’i urojmë Devisit edhe 100 vite të mbushura me suksese dhe surpriza të bukura si këto!
