Vite më parë, teksa numri i kanaleve private televizive përbëhej nga “Tv Shijaku” dhe “Telenorba” e ndonjë tjetër, dolën shumë në modë quiz-et televizive. Besojmë se shumë prej jush kujtojnë pyetjet e thjeshta të cilave duhet t’i përgjigjeshim, duke telefonuar në numra që nisnin të gjithë me “0900”, e që një minutë paguhej 10-fishin e vlerës që kishte vetë çmimi që ofrohej. Një vajzë me emrin Kostana Morava, u bë asokohe figurë shumë popullore, sepse ishte pikërisht prezantuesja e këtyre quiz-eve. Më vonë Kostanën, të buzëqeshur e me zërin karakteristik e pamë në disa formate. Por një ditë, ajo u shkëput papritur nga ekrani. Morava sot është bashkëshorte dhe nënë. E martuar lumturisht me spikerin e lajmeve të News 24 Edvin Parruca, Kostana ka vendosur të rikthehet në ekran duke bërë të njëjtin profesion me të shoqin. Ajo është spikerja më e re e edicioneve informative në televizionin Klan.
