Janë të rrallë ata që e mbajnë mend Sidrit Bejlerin si një këngëtar rock-u me flokë të gjatë. Prej vitesh, portretin e tij pa flokë, Sidriti e “përdor” shpesh edhe për batuta në ekran, aq sa e bën kureshtar publikun për t’iu kthyer pas viteve. Koha e bën shpesh nostalgjik Sidritin për rininë dhe vitet e tij më të bukura. Jo vetëm për grupin muzikor “Black Moon”, me të cilin filloi famën, por edhe për mallin që ka për kohën e flokëve të gjatë.
Këtë pasdite, ish-anëtari i jurisë së “The Voice of Albania” ka qenë i ftuar në programin “Rudina”, në Tv Klan për të ndarë me publikun fazat më të bukura të jetës duke e nisur me fillimet në muzikë. Koha kur Sidriti filloi të merrej me muzikë dhe me grupin e tij të rock-ut është ndër më të bukurat që këngëtari e kujton me shumë nostalgji. Ndaj edhe “përballjen” me veten atëherë kur ishte solisti me flokë të gjatë e konsideron si një “përrallë nga e kaluara”. Në këtë foto, Sidriti është në vitet e tij të para në muzikë, 1998, atëhëre kur bashkë me grupin përgatitnin albumin “100 vjet vetmi”: “Këtu kam qenë në fillimet e mia me grupin “Black Moon, viti 1998. Në këtë kohë kam qenë 22 vjeҫ. Në ato vite sapo kishim filluar të krijonim këngët tona të para, sigurisht të ndikuar edhe nga grupet e rrokut që dëgjonim. Albumi ishte i gjithë në gjuhë të huaj. Kjo, kuptohet, ishte ndikim nga rrymat në botë…” – kujton Sidi.Pasi shikon veten pothuaj 20 vjet më parë, e ka të vështirë t’i fshehë emocionet, ndaj edhe një prej arsyeve që nuk u rikthehet albumeve apo videove të tij të hershme është edhe për faj të natyrës së tij nostalgjike: “Sidomos vitet e fundit…” – tregon ai duke rrëfyer “vuajtjen” që ndien për kohën që ikën… por edhe për flokët – pikën e tij të dobët – që nuk i ka më./RevistaClass
