Pas 4-vitësh fejesë, Semela Mediu vajza e ish-ministrit Fatmir Mediu dhe Bledian Ismaili, djali i kryebashkiakut të Vorës Fiqiri Ismaili, kurorëzuan në martesë dashurinë e tyre. Në një ceremoni mbajtur në hollin e Pallatit të Brigadave, çifti bëri celebrimin pasditen e të shtunës. Burime të “Panorama” thanë se kanë qenë 3 ceremoni të ndara organizuar të enjten dhe të shtunën. Mësohet se të enjten në mbrëmje është organizuar dasma e vajzës në hotel Plazza, ceremoni kjo që ishte kryesisht për miqtë dhe bashkëpunëtorët e ngushtë të Mediut dhe Ismailit. Në katin e 23-të të hotelit u mbajt kokteili, ndërsa ceremonia zgjati nga ora 8 e mbrëmjes deri në 2 të mëngjesit.
Aty kishte të ftuar nga të treja kampet politike. Burimet thanë se në festën e të enjtes mori pjesë Namik Dokle, Lulzim Basha, Nasip Naço, Marko Bello. Ndërsa këngëtarë të ftuar ishin Bujar Çiçi, Reshit Boka, Sajmir Çili, mëson “Panorama”. “Panorama” ka mësuar edhe detaje nga mënyra e organizimit të festës.
Nuk ka munguar muzika tradicionale popullore, madje burimet thanë se ka qenë edhe vetë babai i nuses, Fatmir Mediu që ka kënduar 2-3 këngë popullore.
Ajo që binte në sy ishte arredimi dhe dekori i sallave ku u bë dasma. Ndërsa në menu nuk munguan proshuta, salmoni dhe mishi. Dasma e përbashkët u zhvillua të shtunën në mbrëmje te Hotel Sheraton, ku ishin të ftuar familjarët, rrethi i ngushtë i të dyja krushqive, por edhe ish-kryeministri Sali Berisha.
