Deri më tani kishin munguar fotot supermodeles Angela Martini me nënën e saj shkodrane, qoftë edhe për të bërë krahasimin se kujt i ngjan ajo sa i takon pamjes dhe shtatlartësisë. Ka qenë vetë modelja e famshme në Shtetet e Bashkuara të Amerikës, që e ka prezantuar nënën e saj në një mënyrë shumë të veçantë, me anë të një fotoje pranë Kryeministrit të Shqipërisë Edi Rama, gjatë Samitit të Parë të Diasporës që u organizua në fund të vitit që lamë pas, në Tiranë. Nexhmije Nushbaumer Ibrahimi është mësuesja që jeton në Zvicër, e cila ishte një nga pjesëmarrëset e këtij Samiti për Emigrantët. “Nëna ime në Samitin e Parë të Diasporës Shqiptare të organizuar në Tiranë nga Kryeministri i Shqipërisë z. Edi Rama”, ishte mbishkrimi i modeles Angela Martini sipër fotos së nënës së saj afër Edi Ramës. Gjatë samitit ajo u takua edhe me kryetarin e Bashkisë së Tiranës, Erion Veliaj. Nexhmija, e cila jeton në Zyrih të Zvicrës punon si mësuese e gjermanishtes për shqiptarët në projektin “Drita”, ka marrë shumë vlerësime nga komentuesit e të bijës së famshme, sa i takon kontributit në këtë samit, në dobi të shqiptarëve që jetojnë në Diasporë. Në Zyrih ajo ka marrë përsipër dy klasa me shqiptarë nga Kosova, që synojnë integrimin atje, klasa që shteti zviceran ia ka lënë në dorë Nexhmijes, shkruan “Panorama”. Ajo është vlerësuar me shumë çmime si mësimdhënësja më e mirë shqiptare në Zyrih dhe për këtë e njohin shumë shqiptarët e Diasporës.
