Sapo jemi prezantuar me trajnerin e ri të Kombëtares Shqiptare. Ai quhet Cristian Panucci dhe është ish-futbollist italian. Por përtej kësaj, ne si revistë rozë që jemi, na intereson më shumë privatësia. Nëse me italianin De Biasi gjërat ishin si një libër i hapur pasi ai është lumturisht i martuar e baba i një vajze, me “misterin” e ri situata është pak më e komplikuar. Ai është i dashuruar me një vajzë të famshme në shtetin fqinjë. Bëhet fjalë për balerinën bukuroshe e historike të “Ballando con le stelle” (versioni italian i “Dancing With The Stars”) Samanta Togni, shkruan “revistawho.com”. E pikërisht në këtë spektakël lindi gjithçka.
“U njohëm në “Ballando con le stelle” dhe aty për aty nuk është se u frekuentuam shumë. Unë jetoj në Umbria, shkoj e vij e nuk frekuentohem me konkurrentët e programit. Pra atje thjesht u njohëm, po më la një përshtypje të mirë ndonëse nuk folëm më. Pastaj u pamë rastësisht ca kohë më vonë sepse ai stërviste skuadrën e futbollit të qytetit tim, e pak nga pak e gjetëm njëri-tjetrin”, tregon balerina.
Në fakt bëhet fjalë për një dashuri të re. Ata kanë vetëm disa muaj që janë lidhur.
“Jam shumë e lumtur. Çdo ditë e re është një rilindje, por gjithmonë me atë ç’ka ka lënë pas një ditë më parë. Jam e lumtur e mund të them vetëm “mirë”. Të jesh mirë me partnerin është një vlerë e shtuar e shumë e rëndësishme për të të dhënë forcë për përditshmërinë dhe punën”, rrëfeu bukuroshja për programin “Storie Vere” (histori të vërteta) në “Rai 1”./ revistawho.com
