Planet e Rita Orës për të ndërtuar një palestër në oborrin e rezidencës së saj luksoze në veri të Londrës, kanë ngjallur pakënaqësi të madhe në lagje. Artistja, e cila bleu pronën e klasifikuar si ndërtesë e mbrojtur (Grade II) në vitin 2021 për 7.5 milionë paund, po përballet me kundërshtimin e fqinjëve të saj.
Një grup banorësh nga një bllok aty pranë kanë dorëzuar një ankesë të përbashkët, duke paralajmëruar se ndërtimi do të sjellë ndriçim artificial, zhurmë dhe humbje të privatësisë. Ata shprehen skeptikë ndaj izolimit akustik të planifikuar, duke përmendur se dyert e mëdha rrëshqitëse të palestrës mund të lejojnë muzikë dhe zëra të lartë në çdo orë.
Fqinjët kujtojnë gjithashtu rregullat ekzistuese në zonë që ndalojnë grumbullimet e mëdha për të ruajtur qetësinë, ndërsa disa banorë kanë ngritur edhe shqetësimin për ndikimin e projektit tek fauna lokale, si ketra dhe dhelpra.
Pavarësisht polemikave, projekti i Rita Orës parashikon izolim të plotë të palestrës nga zhurma. Autoritetet lokale pritet të shqyrtojnë kërkesën për lejen e ndërtimit në javët e ardhshme.
