Kënga hit e viteve ’90, “Sytë e tu” e kënduar nga Frederik Ndoci është ndër të paktat këngë të atëhershme që pas pjesëmarrjes në Festivalin e RTSH-së, pati mundësinë e realizimit të një klipi.
Vajza protagoniste në videoklipin e këngës është pikërisht Xhoana Nano, bashkëshortja e ish-kryeministrit Fatos Nano. Ka qenë pikërisht kantautori shkodran i cili ka rikthyer në vëmendje një fakt të harruar nga koha, që sot mund të duket sikur po zbulohet një sekret.
Frederik Ndoci është shprehur për Panorama duke thënë: “Në atë kohë Xhoi ishte një adoleshente që ndiqte studimet në gjimnazin “Petro Nini”. Ajo ishte në sintoni me këngën me sytë e saj të thellë. Ajo ishte një bukuri e rrallë e asaj kohe, që iu bë vlerë e shtuar këngës”.
Por siç thotë kantautori, videoklipi është zhdukur nga arkivat. Madje Frederik Ndoci ka treguar se edhe Xhoana Nano është interesuar për të gjetur klipin, ndoshta nga nostalgjia për rininë.
