Kryetari i bashkisë, Erion Veliaj ka qenë pasditen e sotme i ftuar në proramin e pasdites me Rudina Magjistarin. Ai ka rrëfyer eksperiencën e tij pasi u infektua me ‘Covid-19’ dhe u vetizolua së bashku me djalin dhe bashkëshorten në shtëpi.
“Fillimisht djali kishte pak temperaturë, mjeku tha me gjasa do i dalin dhëmballët. Pastaj temperatura i zgjati shumë pak, dy ditë, edhe mesa duket ishte e vërtetë ajo që shkenca thotë që fëmijet e kalojnë lehtë dhe shpejtë. Pastaj pati Ajola pak temperaturë, po menduam një infeksion apo diçka. Pastaj më zuri dhe mua, por ishim me interval 3-4 ditë nga njëri-tjetrin dhe bëmë testin dhe zbuluam që ishim të tre të infektuar dhe në shtëpi. Ndonjëherë shumë prindër duke qenë se fëmijët i shikojnë si engjëj dhe engjëj janë, nuk dyshojnë. Pra askush nuk dyshon tek fëmijët e vetë. Duke qenë se jemi pa dyshim, ne në fakt harrojmë që ata e bëjnë pa vetëdije bartjen. Fëmijët janë akoma më të pafajshëm se luajnë me njëri-tjetrin, përqafohen, preken dhe padashje bartin sëmundjen”, ka treguar Veliaj në emision.
Më tej ai ka shtuar se i merr gjërat me sportivitet dhe optimizëm dhe se ‘Covid-19’ ishte sfidues. I pyetur nëse pati në ndonjë moment frikë nga virusi, Veliaj tregoi: “Jo, frikë jo. A pata dhimbje? Ishte një moment që vetëm djersija. Në dallim nga një grip normal që ka një kulm dhe pastaj fillon zbret, grafiku ishte pak si dhëmbët e sharrës. Pra ndihesh disa momente mirë dhe thua ia hodha, pastaj këputesh sikur të ka shtypur ai ruli i komunales. Kështu që e mora me sportivitet dhe humor, po zbulova disa gjëra Rudina, së pari zbulova shumë kolegë që e kishin dhe shumë njerëz të njohur”./revistawho.com
