Nga Lorena Resulaj
“Ftesë për 5” do të jetë emisioni më i ri në ‘Top Channel’, që do ta vendosë Bieta Sulon në rolin e moderatores dhe jo vetëm. Sapo Bieta na prezantoi me spotin e këtij programi, menjëherë shumë pyetje na erdhën në kokë, me dëshirën për të zbuluar diçka më tepër për një emision të padëgjuar më parë. Një format krejtësisht i ri, i dedikuar çdo familje shqiptare dhe jo vetëm kaq. Në një rrëfim ekskluziv për ‘RevistaWho.com’, Bieta ka zbuluar çdo detaj të emisionit që pritet të nisë së shpejti dhe që do t’i mbajë të gjithë të mbërthyer pas ekranit.
Përveç rolit të moderatores do të ketë Bieta ndonjë rol tjetër në emision si përshembull autore e tij?
Unë do të jem autore dhe moderatore. Puna me gazetarët, organizimi i redaksisë është ajo që e kam shumë për zemër. Është puna që unë kam kryer këta 13 vite në ‘Top Show’ dhe besoj që është një armë shumë e fortë. Eksperienca më e pakët në ekran, nga ana tjetër, mendoj që është një freski që i duhet një televizioni dhe aq më tepër një formati të ri.
Formati do te jetë i njëjtë me atë të ‘Pasdite në Top Channel’ apo do të jetë një emision krejtësisht i ri?
“Ftesë për 5” është një program i ri në “Top Channel”. Është një program “zemër”, një vakt i mesëm, shume i shijshëm që vështirë t’i rezistosh.
Cilës grupmoshë do t’i dedikohet emisioni?
Vetë orari, i cili gjithashtu pritet të jetë një risi programacioni, të bën të kesh një target grup shumë të gjerë. Askush nuk përjashtohet, të gjithë janë të ftuar dhe kanë një ftesë të plotë, për 5 ditë.
Çfarë tematikash do të trajtohen kryesisht në emision?
E përditshmja e çdonjërit do të jetë pjesë e përmbajtjes. Rrëfimi, argëtimi, ngjarjet e qytetit dhe fshatit, Shqipërisë e Kosovës, gjithçka që flet shqip do të jetë bashkëbisedimi dhe rrugëtimi ynë i përbashkët.
Si ndiheni për këtë eksperiencë të re?
Ndihem e vlerësuar dhe me përgjegjësi të plotë për numrin e ditëve që do të jemi në shtëpinë e çdo shqiptari. E sigurtë në eksperiencën e deritanishme, me dëshirë për të gjitha sfidat e një emisioni, që premton për çdo grupmoshë dhe mikpritës për të gjithë të ftuarit dhe teleshikuesit, që tashmë do të kenë një orar të ri dhe një ftesë për 5 ditë. /revistawho.com
