“Në fundjavë e kam pushim, s’do të mbaj dietë!”. “Një herë në javë, do të ha çfarë të dua!”. Këto janë disa nga shprehjet që dëgjojmë shpesh nga personat, që duan të bien në peshë. Sipas një studimi në universitetin e Pitsburgut, rezultoi se personat që hanë shumë në fundjavë në të tre vaktet e ditës, rrezikojnë të shtojnë në peshë dhe ta kthejnë atë në një zakon për të gjithë vitin.
Për të shmangur konsumimin e tepërt të ushqimit, në fundjavë ndiqni strategjitë e mëposhtme:
Planifikoni fundjavën – Zakonisht, në fundjavë palnifikojmë mini-pushime. Por planifikimi i ushqimit parandalon ndjesinë e fajit ditën e hënë. Zgjidhni të hani kokoshka, duke parë një film të shtunën në darkë, ose një mëngjes të vonë ditën e diel, ndërsa në vaktet e tjera hani shëndetshëm.
Ndryshoni kalendarin e aktiviteteve tuaja – Në vend që të qëndroni në shtëpi dhe të hani gjithë qejf ushqimet e preferuara që gatuan mami, zgjidhni të vizitoni një muze, të shikoni një shfaqje apo të ndiqni aktivitete, të cilat ua largojnë vëmendjen nga ushqimi.
Dëgjoni trupin tuaj – Gjatë javës ju hani të kushtëzuar nga oraret e punës. Në fundjavë mundohuni të kuptoni nevojat e trupit tuaj. Në qoftë se nuk keni ndjesinë e urisë, pavarësisht se mund të keni përballë një ushqim tundues, prisni. Kur të ndiheni të uritur, filloni të hani ngadalë dhe ngrihuni nga tavolina pa u ngopur.
Këto hile të vogla do t’iu ndihmojnë, që të njëjtat xhinse t’i vishni edhe vitin tjetër.
