Nga dita e djeshme Loredana është kryefjala e mediave shqiptare dhe atyre zvicerane. Reperja shqiptare u arrestua mbrëmjen e 7 majit në një apartament në Luzern si e akuzuar për vjedhjen e 700 mijë frangave ndaj një çifti zviceran. Pavarësisht se ngjarja nuk është vërtetuar ende, reagimet për këtë ngjarje qenë të shumta. Duke qenë se vjedhja dhe kërcënimi konsiderohet si një akuzë e rëndë mbetet në pikëpyetje karriera e Loredanës si këngëtare.
Gazeta zvicerane “20 minuten” ka bërë një shkrim vetëm për këtë çështje, ku ka shtruar pyetjen se çfarë do të ndodhë me Loredanën si artiste pas kësaj ngjarje. Menaxheri i muzikës, Oli Rosa, ka thënë për “20 minuten” se reperja shqiptare vepron në një mjedis ku energjia e keqe konsiderohet si diçka e mirë dhe shton besueshmërinë tek fansat. Megjithatë si Rosa, po ashtu edhe themeluesi i revistës “Lyrics”, Elia Binelli, kanë thënë se karriera e reperes shqiptare mund të shkatërrohet nëse ajo dënohet me burg.
“20 minuten” shkruan se ky është një fenomen i zakonshëm tashmë, sepse reperë të shumtë në botë si 6ix9ine, YNW Melly, pavarësisht se janë akuzuar për vepra të rënda këngët e tyre vazhdojnë të dëgjohen. Loredana së fundmi ka publikuar këngën, “Romeo & Juliet”, në bashkëpunim me Mozzik, e cila është transmetuar më shumë se 27 milionë herë dhe është një ndër më të dëgjuarat në “Spotify”. /revistawho.com
