Aktori i njohur Gent Hazizi ka folur për herë të parë publikisht mbi një ngjarje tronditëse që ka lënë gjurmë të pashlyeshme në jetën e tij – vetëvrasjen e të vëllait. Gjatë një interviste në emisionin “Një gotë Rose”, ai ndau me publikun detaje të dhimbshme nga kjo tragjedi familjare.
Hazizi kujtoi se ishte vetëm 5 vjeç kur ndodhi ngjarja e rëndë, dhe prindërit e tij, në përpjekje për ta ndihmuar ta kapërcente traumën, e dërguan në shkollë më shpejt se zakonisht. Megjithatë, aktori theksoi se ngjarja i ka mbetur e freskët në kujtesë, pasi e përjetoi nga afër.
“Kam gjithmonë në mendje një fotografi me vëllain tim të shtrirë… Një litar gjaku dhe unë mendoja se nëse do t’ia hiqja, do ta shpëtoja. Ai vrau veten, një tragjedi e rëndë për familjen tonë. Asokohe punonte në Drejtorinë e Dytë, kishte armë. Nuk dua të hyj në detaje për rrethanat, por ajo çfarë ka rëndësi është që unë e pashë gjithçka dhe kjo më ka ndjekur gjatë gjithë jetës sime,” rrëfeu Hazizi.
Ai shtoi se për vite me radhë ndjeu sikur një pjesë e tij kishte vdekur bashkë me të vëllain. Gjithçka ndryshoi pas një përvoje transformuese gjatë studimeve në Itali, ku një mësuese i hapi sytë për të përballuar dhimbjen e kaluar.
“Po përgatitesha për rolin e Mark Antonit, dhe po përdorja kujtimin e vëllait tim për të shprehur dhimbjen për vdekjen e Cezarit. Ajo më tha: ‘E ke gabim. Ti nuk e ke falur ende vëllain tënd’. Ajo më udhëhoqi drejt një ushtrimi të thellë emocional. Më tha: ‘Mbylli sytë, shikoje vëllain tënd, fale dhe lëre të shkojë.’ Ishte një përvojë tronditëse, por pas kësaj ndjeva një çlirim të madh,” kujtoi aktori.
Hazizi e mbylli rrëfimin duke treguar se falja i dha forcën për të çliruar dhimbjen e grumbulluar dhe për të jetuar më lirshëm. Ai ndau këtë histori për të treguar se falja, edhe në rrethana të vështira, mund të jetë çelësi për shërimin emocional.
