Një tjetër kapitull i errët është shtuar në jetën e aktorit të njohur francez Gérard Depardieu. Ikona e kinemasë franceze është dënuar nga një gjykatë në Paris me 18 muaj burg me kusht, pasi u shpall fajtor për sulm seksual ndaj dy grave gjatë xhirimeve në vitin 2021.
Depardieu, i cili për dekada ka qenë një nga figurat më të njohura të ekranit në Francë dhe jo vetëm, i kishte mohuar kategorikisht akuzat dhe kishte kërkuar që rasti të pushohej. Megjithatë, gjyqtari Thierry Donard theksoi se “versioni i tij i ngjarjeve nuk ishte bindës”, duke çuar në vendimin për dënim me kusht.
Rasti ka tërhequr vëmendje të gjerë në mediat franceze dhe ndërkombëtare, për shkak të famës së Depardieu dhe natyrës së akuzave. Aktori është përballur më herët edhe me akuza të tjera të ngjashme, të cilat i ka mohuar vazhdimisht.
