Balerini i njohur Gerd Vaso ka folur për herë të parë publikisht mbi ndarjen nga balerina Enada Hoxha, duke zbuluar se fundi i martesës së tyre erdhi si pasojë e ndryshimit të prioriteteve mes tyre. I ftuar në “Grida Duma Podcast”, Vaso rrëfeu se ndërsa Enada ishte e përkushtuar në mënyrë absolute ndaj karrierës, ai vetë kishte vendosur një kufi të qartë mes profesionit dhe jetës personale.
“Është shumë e vështirë të punosh bashkë,” u shpreh ai, duke shtuar se për të puna ka kuptim vetëm derisa i sjell kënaqësi, ndërsa përtej kësaj nuk e sheh të nevojshme të shkojë. Ai la të kuptohet se përkushtimi i madh i Enadës ndaj baletit ndikoi në marrëdhënien e tyre, ndërsa vetë iu desh të bënte shumë sakrifica personale.
Vaso nuk e fshehu dhimbjen që ka përjetuar pas ndarjes, duke e përshkruar këtë periudhë si një nga më të vështirat e jetës së tij. Ai dhe Enada ishin një nga çiftet më të dashur të skenës shqiptare, ndaj lajmi i ndarjes së tyre i surprizoi shumë fansat.
“Në këtë jetë, nëse në një moment të caktuar Nada humbi Gerdin, unë gjatë rrugëtimit tim mund të kem humbur shumë gjëra, personalitetin tim, dinjitetin, karakterin, Gerdin që isha dikur: ai i qeshuri, i gëzuari me miq e shokë,” u shpreh ai me sinqeritet.
Në përmbyllje, Vaso tha: “Dola nga vetja ime. Patjetër që dola nga vetja, dola nga vetja për dashurinë, për profesionin, për karrierën.”
Fjalët e tij tregojnë se balerini u përpoq të përshtatej dhe të sakrifikonte shumë për marrëdhënien e tyre, por në fund, ndarja erdhi kur nuk mundi më të vazhdonte të humbte veten.
