Reperi i njohur shqiptar, Getoar Selimi, ka ndarë për herë të parë me publikun një kapitull të vështirë dhe të padukshëm të jetës së tij. I ftuar në një emision televiziv, ai rrëfeu se është përballur me një diagnozë tronditëse: kancerin.
“Kam pasë kancer”, deklaroi Geti, duke e përshkruar periudhën si një nga më të errëtat që ka kaluar ndonjëherë — sfiduese jo vetëm për shëndetin dhe emocionalisht, por edhe për karrierën e tij si artist.
Ai tregoi se kishte zgjedhur të mos e ndante me publikun këtë përvojë, duke mbajtur gjithçka për vete dhe për rrethin e ngushtë familjar. “Nuk kam dashur të kërkoj mëshirë. E kam mbajtur për vete, për familjen. Nuk doja që njerëzit të më mëshironin, por të më mbanin mend për atë që jam si artist dhe si njeri.”
Sipas tij, rikuperimi erdhi falë përkushtimit personal, forcës shpirtërore dhe mbështetjes së pakushtëzuar nga të afërmit. “Mbështetja që kam pasur nga njerëzit e mi të afërt më ka dhënë forcë të ec përpara. Jam mirënjohës për çdo ditë që kam sot,” shtoi ai me mirënjohje.
