Jessie J është rikthyer në spital vetëm gjashtë javë pas operacionit për heqjen e kancerit të gjirit. Këngëtarja britanike ka treguar se është përballur me komplikacione të reja që e kanë detyruar të kërkojë ndihmë mjekësore në mënyrë urgjente.
Në një postim prekës në rrjetet sociale, ajo publikoi një foto nga krevati i spitalit, ku shihej me një kateter intravenoz në krah. Jessie sqaroi se është shtruar të shtunën më 2 gusht për shkak të disa simptomave shqetësuese:
“Kështu i kalova 24 orët e fundit. Gjashtë javë pas operacionit dhe e gjeta veten përsëri në të njëjtin repart spitalor. Nuk pritej ose nuk ishte planifikuar.”
Pasi iu nënshtrua një sërë analizash, mjekët përjashtuan një mpiksje gjaku, por zbuluan një infeksion të paidentifikuar dhe lëng në mushkëri. Jessie J tregoi se po përjeton vështirësi në frymëmarrje dhe se pas daljes nga spitali, trajtimi i saj do të vazhdojë në mënyrë ambulatore:
“Kisha – dhe ende kam – simptoma që sugjeronin një mpiksje gjaku në mushkëri. Nuk është mpiksje gjaku, falë Zotit. U bënë shumë teste, të cilat në fund treguan se kam një infeksion (të cilin ende po përpiqen ta identifikojnë) dhe pak lëng në mushkëri. Kam vështirësi në frymëmarrje normale, por u lirova mbrëmë (nuk i duroj dot spitalet) dhe hetimi do të vazhdojë në mënyrë ambulatore.”
Në një tjetër reagim emocional, ajo foli për sfidën që po kalon jo vetëm si paciente, por edhe si nënë:
“E di që shumë njerëz që kanë kaluar diçka të ngjashme mund të pajtohen ose jo me atë që do të them, dhe kjo është plotësisht në rregull. Por për mua, pjesa vërtet e vështirë e kësaj përvoje, fizikisht, ishte dita e operacionit. Rimëkëmbja, fizikisht, nuk është aspak e shpejtë ose e lehtë, dhe psikologjikisht, është koha më e vështirë që kam kaluar ndonjëherë. Sidomos si nënë e një fëmije të vogël, kur nuk mund të jem nëna që isha më parë.”
Në muajin qershor, artistja 37-vjeçare zbuloi përmes një videoje në Instagram se ishte diagnostikuar me kancer në fazë të hershme, duke deklaruar më pas se “kanceri u hoq plotësisht” pas ndërhyrjes kirurgjikale.
Ndjekësit e saj i kanë qëndruar pranë me mesazhe mbështetjeje ndërsa ajo vazhdon këtë rrugëtim sfidues drejt shërimit.
