Jemi mësuar që të dëgjojmë shpesh shprehjen “Gjërat e mira bëhen avash-avash”, por në rastin e moderatores së famshme të “Top Channel” dhe “Top Albania Radio”, Elona Duro, gjërat e mira duket se ndonjëherë bëhen edhe shpejt e shpejt. Vetëm një javë më parë, të gjithë u surprizuan nga lajmi se Duro ishte në pritje të ëmbël dhe tashmë po përgatitej edhe për martesën. “Unë dhe Lorenci kemi një vit e gjysmë së bashku kështu që gjithçka ka ndodhur shumë shpejt: lidhja, bashkëjetesa, bebi dhe tani martesa.” –shprehet Elona Duro e kontaktuar nga “Xing.al”.
Ashtu siç rrëfeu moderatorja, ajo dhe partneri i saj Lorenc Goga, i cili drejton një kompani call center në Tiranë, do të lidhin kurorë më 4 gusht, në tarracën e Bashkisë së Tiranës ku kryebashkiaku Erion Veliaj do t’i kurorëzojë në martesë. “Kjo do të jetë vetëm ceremonia e celebrimit që do të shoqërohet me një koktej, pasi kemi menduar që dasmën e madhe ta bëjmë ndoshta pas një viti e gjysmë.”-shprehet moderatorja e njohur.
Por ndryshe nga pjesa më e madhe e nuseve që sa më shumë afrohet dita e madhe aq më nervoze bëhen, Elona duket tërësisht e qetë. “Ah për këtë jam e qetë sepse gjithçka e ka marrë në dorë Ami, kështu që unë pres vetëm të nusëroj.”- shprehet Duro duke treguar se për detajet e ceremonisë është kujdesur tërësisht kompania “Ami Event”.
Madje me të njëjtën lehtësi duket se ka kaluar edhe momenti i përzgjedhjes së fustanit, duke qenë se siç rrëfeu Elona, ka zgjedhur fustanin e parë që ka provuar. “Fustani nuk është një fustan tipik nusërie, por është shumë i bukur. Madje është fustani i vetëm që provova pasi më tha Ami se atë e kishte hequr veç enkas për mua.”- tregon Elona.
Në ceremoninë që do të përfshijë muzikë harqesh dhe një spektakël fishakzjarresh, do të jenë të ftuar të afërm por edhe miq të çiftit, ku sigurisht do të jenë edhe personazhe VIP.
Sakaq përsa i përket pritjes së ëmbël, Elona rrëfen se është në muajin e katërt të shtatzënisë. “Deri më tani çdo gjë ka shkuar mirë por për emrin nuk kemi menduar akoma. Lorenci ka jetuar pjesën më të madhe të jetës së tij në Itali kështu që shpresojmë të gjejmë një emër që lidhet me të dy vendet, si Shqipërinë ashtu edhe Italinë.”-rrëfeu Duro.
Marrë nga Xing.al
