“Euronews” në partneritet me “IN Media Group” qw është krijuar në vitin 2013, transmeton në televizionin “IN TV”, kanalin e vetëm për të rinjtë në Shqipëri dhe radion “IN Radio 105.7”, kanë njoftuar hapjen e “Euronews Albania”, televizioni dhe platforma më e re dixhitale mediatike në Shqipëri. “Euronews” do të shtrihet në të gjitha trevat shqipfolëse në Kosovë, Maqedoni dhe Malit të Zi.
“Euronews” po fillon kështu një rrugëtim të ri, duke krijuar një ‘Euronews franchise’ për herë të parë. Synimi i këtij partneriteti është që “Euronews” të kthehet në median numër një “globale” në Europë dhe në botë.
Sipas marrëveshjes së nënshkruar, në tetor 2018, grupi “Euronews” do të kontribuojë me ekspertizën e vet, si edhe me qasjen shumëkulturore që do të sjellë tek media e re. Po ashtu, shprehja e të gjitha pikëpamjeve dhe pasqyrimi i pakrahasueshëm ndërkombëtar do të jenë garanci për cilësinë e shkëlqyer që do të ketë “Euronews” Albania. Nga ana tjetër, “Euronews” do të ketë mundësinë të përdorë mbulimin rajonal të “Euronews Albania-s” në të gjitha platformat e saj.
“Euronews Albania” pritet të nisë transmetimet në vitin 2019, ndaj edhe janë bërë përpjekjet e para për gjetjen e profesionistëve më të mirë që ka vendi. Media e re do të krijojë vende të reja pune, pasi “Euronews Albania” do të ketë rreth 100 punonjës në momentin e nisjes së transmetimeve. Sipas Indeksit Global të Internetit 2017, “Euronews” është i pranishëm në 450 milionë familje në të gjithë botën dhe ka 125 milionë shikues në muaj./revistawho.com
