Gjimnazisti vret veten, e tallnin në klasë në Berat: “Ti je fshatar”

Nuk duroi dot talljet e vazhdueshme nga shokët e klasës për shkak të origjinës së tij nga fshati, nxënësi i jep fund jetës duke konsumuar fostoksinë, shkruan “Panorama”. Ngjarja ndodhi dje në qytetin e Beratit. 17-­vjeçari P. Xhaferaj dyshohet se i ka dhënë fund jetës në kushtet e një ngarkese të rëndë psikologjike, pasi shokët e konsideronin atë si “fshatar” dhe e mbanin larg tyre. Sipas të dhënave të Policisë së Beratit, mjekët e spitalit rajonal i kanë njoftuar dje për një rast urgjence të një adoleshenti që rezultoi i vetëhelmuar. Blutë mbërritën menjëherë në vend dhe nisën hetimet. Por nuk kanë mundur dot të marrin dëshminë e 17­ vjeçarit pasi ai ka qenë në gjendje të rëndë dhe disa momente më pas ka ndërruar jetë. Menjëherë pas kësaj, janë njoftuar familjarët e tij që jetojnë në fshatin Tomorr, njësia administrative Vertop. Burime nga Policia bënë të ditur se nga hetimet e deritanishme dyshohet se adoleshenti kishte rënë pre e bulizmit (talljeve) në shkollë dhe nuk e ka përballuar dot psikologjikisht këtë. Nga të dhënat rezulton se Xhaferaj kishte ardhur për të studiuar në shkollën profesionale të Beratit dy vite më parë, pasi në fshatin e tij nuk ka shkollë të mesme. Por ai nuk ka arritur dot të futet në shoqërinë e djemve të klasës, të cilët e nënvlerësonin atë si një djalë fshati. Ai është ndier i përjashtuar, pasi nuk e bënin asnjëherë pjesë të shoqërisë së tyre. Madje, sipas të dhënave, disa nga shokët e klasës e tallnin atë në vazhdimësi, duke i shkaktuar stres të vazhdueshëm. Mësohet se kohët e fundit ai kishte shfaqur shenja të dukshme të ngarkesës emocionale. Ai nuk afrohej me asnjeri dhe nuk bëhej pjesë e asnjë aktiviteti të klasës së tij. Policia ka marrë në pyetje disa nxënës së vitit të dytë, të cilët kanë pohuar se ai qëndronte i tërhequr dhe menjëherë pasi mbaronte mësimi nisej me furgon për në fshatin e tij, rreth 20 km larg qytetit të Beratit. Këtë rrugë ai e kryente çdo ditë me furgonë të linjës. Kështu ka ndodhur edhe ditën e djeshme. 17­ vjeçari ka blerë një sasi fostoksine në qytetin e Beratit dhe sapo ka mbërritur në banesë, e ka pirë atë. Familjarët e kanë gjetur pa ndjenja dhe në gjendje mjaft të rëndë, duke e transportuar menjëherë për në spitalin e Beratit por, fatkeqësisht, me gjithë ndërhyrjen e mjekëve ai nuk ka arritur dot të mbijetojë. Blutë kanë marrë në pyetje edhe familjarët e tij, por ata kanë deklaruar se nuk kanë qenë në dijeni të ndonjë problemi dhe as kishin vënë re ndonjë shqetësim të tij. Policia nuk bëri të ditur detaje të tjera rreth dëshmisë së dhënë nga nxënësit që janë marrë në pyetje, veç faktit se disa prej tyre kanë pohuar se bashkëmoshatari i tyre ishte bërë shpesh objekt talljeje dhe se kjo gjë i kishte shkaktuar atij izolim social të dukshëm nga pjesa tjetër e klasës./ Panorama