Gjykata e Tiranës ka dhënë vendimin në favor të këngëtares Jonida Maliqi. Ajo u paraqit pranë Gjykatës së Tiranës me padinë e mospagesës së detyrimit ekonomik nga ish-burri i saj Gent Prizreni, për djalin e tyre. Sipas një marrëveshjeje të firmosur nga të dyja palët, ky i fundit duhet të paguante shumën prej 2000 eurosh për të birin, Danin, shumë që nuk ishte paguar prej muajsh. Menjëherë pas padisë, Prizreni bëri publike disa fatura që përkonin me dy muaj të këtij viti. Pas kësaj, këngëtarja ka bërë publike faturat e derdhjeve në llogari, që i përkasin periudhës tetor 2022-mars 2023. Në fatura duket se shuma që është paguar është 1500 euro, duke mos iu përmbajtur marrëveshjes së bërë nga dy palët. Sipas reagimit të Jonidës, ish-burri i saj shumë për të cilën kanë rënë dakord e ka paguar vitet e para dhe më pas ka paguar më pak, duke e quajtur shumë të konsiderueshme për ushqimin e të birit.
Ka qenë Jonida ajo që ka bërë të ditur se përgjatë viteve ka qenë ajo që është kujdesur për pagesën e shkollës së djalit të tyre dhe ish-partneri ka kontribuar vetëm dy vitet e para dhe më pas e ka ndërprerë.
Madje, ajo tregon se ai nuk është përgjigjur as për terapitë e së birit për të cilat, njëjtë si dhe për detyrimet e tjera i është dashur që të përballet vetëm. Në reagimin e saj, Jonida thekson se prej 3 vitesh nuk paguhet shuma e vendosur në marrëveshje dhe prej 8 vitesh (prej ndarjes së çiftit) nuk është bërë asnjë pagesë për terapitë e të birit.
Ditën e sotme, Gjykata e Tiranës ka dhënë vendimin në favor të këngëtares. Burime për “WHO” theksojnë se Gjykata e Tiranës ka urdhëruar Zyrën e Përmbarimit të kryeqytetit, që brenda 5 ditëve nga marrja e vendimit të gjyqtarëve, të bëhet ekzekutimi i detyrueshëm i vendimit për pensionin ushqimor. Në kundërshtim me vendimin, do të ketë ndërhyrje nga institucionet përkatëse.
