Gjyqtari i ngacmoi të bijën pas divorcit, flet i ati: U tronditëm se e kemi dhe kushëri, vajza ime me moral të lartë

Shyqyri Çobo, gjyqtari që kërkoi favore seksuale nga 32-vjeçarja nga Berati, në fakt është në lidhje farefisnore me të. Këtë e bën të ditur vetë i ati i Irma T., i cili thotë se bashkë me pjesën tjetër të familjes janë ndier të tronditur kur kanë mësuar se çfarë kishte ngjarë. Vetë nëna e një fëmije është larguar te të afërmit e saj në Rrëshen, për të qenë larg qytetit, ku siç tregojnë familjarët, i ka shkaktuar shumë shqetësime. Familjarët e të resë së divorcuar nga i shoqi nuk e dinin historinë e mesazheve dhe telefonatave ngacmuese, deri sa vetë e bija ua ka treguar, e më pas bëri dhe denoncimin karshi Çobos. “Vajzën e shihnim të shqetësuar kur vinte në shtëpi, pasi kishte mbaruar seanca gjyqësore. Disa herë e kisha pyetur, por ajo ngurronte të më shpjegonte përse rrinte e mërzitur. Duke e ditur se ne jemi kushërinj me gjyqtarin, nuk na vinte mendja që ai do t’i kryente këto veprime. Nuk na shkonte kurrë në mendje se ai do të ishte aq i lig, sa të ngacmonte vajzën tonë. Unë i them diçka publikisht atij: Le ta quajë si të dojë, me shprehjet në mesazhe, si “mos u bëj fshatareske” e të tjera si këto. Por i them gjyqtarit Çobo se ime bijë qëndron shumë më lart nga ana morale se ai. Një gjyqtari që i është besuar zbatimi i ligjit, nuk i lejohet që të kryejë veprime të tilla shumë të ulëta. Gjyqtarë si ky janë fatkeqësi për Drejtësinë tonë. Të jesh njeriu i ligjit, nuk do të thotë që të kërkoshatë që s’të takon dhe të dalësh jashtë çdo morali. Për ne, familjen tonë, është e papranueshme”, thotë Ylmi T./ Panorama