Grida Duma ka ndarë detaje prekëse dhe personale mbi mënyrën se si e përjeton dashurinë, gjatë një interviste në emisionin “Goca dhe Gra”. Politikania dhe opinionistja tregoi se dashuria është thelbësore në jetën e saj dhe pa të nuk mund të funksionojë.
“Dashuria është gjithëkuptimi i gjësë, i së gjithës. Dashuria është gjithçka, pa dashurinë nuk bëj asgjë. Çdo gjë që bëj e dua deri diku, shumë apo pak, por pa e dashur nuk e bëj,” – u shpreh ajo.
Duma theksoi se marrëdhëniet kërkojnë kompromis dhe sakrificë, sidomos kur dashuria është në rrezik. Ajo pranoi se në emër të dashurisë, ka ndryshuar ndjeshëm, një proces që e ka përjetuar si shumë sfidues.
“Gjëja më e madhe që kam bërë për të mos humbur dikë, kam ndryshuar shumë nga vetja, është gjëja më e dhimbshme për mua. Mendoj që bëj çdo ditë sakrifica. Sidomos këtë vit kam bërë shumë sakrifica.”
Për Grida Dumën, dashuria në distancë mbetet më shumë një iluzion sesa një realitet i jetueshëm. Ajo tha se preferon përjetimet reale dhe të përbashkëta, përkundrejt ndjenjave që mbahen vetëm përmes largësisë.
“Dashuria në distancë mbahet gjallë deri diku. Për mua nuk është dashuri, është iluzion. Unë dua gjërat reale, gjërat me të cilat njerëzit janë bashkë, përjetojnë çdo gjë bashkë.”
Në përfundim, Duma shtoi se një marrëdhënie kërkon lëshime dhe përpjekje për të akomoduar tjetrin, gjë që ajo vetë e ka mësuar me kohë.
“Egoja pengon shumë… Që të akomodosh tjetrin duhet të lësh nga egoja jote shumë. Kam mësuar ta bëj, nuk e bëja kollaj. Por fillon ta bësh që të mos humbësh tjetrin. Njeriu duhet të ndryshojë.”
