Sekretarja për Marrëdhëniet me Publikun në Partinë Demokratike, Grida Duma ka reaguar lidhur me video skandalin e dhunës së ushtruar nga pronarja e një kopshti privat, Anjeza Shabani ndaj fëmijës 3-vjeçar.
Përmes një reagimi në rrjetet sociale, Duma shpreh mallkimet për njerëzit që pasi rrahin barbarisht një fëmijë, në të njëjtin moment i bëjnë foto viktimës së pambrojtur për të reklamuar biznesin.
Reagimi i Dumës nis me vlerësimin për kombëtaren shqiptare.
“Qofshin bekuar!
…ata që edhe me një loje futbolli i bëjnë shqiptarët kudo që janë të brohorasin, të dëshirojnë të vishen me flamurin dhe simbolet kombëtare; i bëjnë shqiptarët të cilët duan të largohen nga vendi i tyre të vishen kuq e zi dhe të brohorasin për Shqipërinë që kanë në shpirt.” shprehet Duma.
Më tej ajo shpreh mallkimet edhe ata që po degradojnë figurën e femrës shqiptare. “Qofshin mallkuar, të gjithë ata apo ato që degradojnë figurën e gruas shqiptare e cila ndër shekuj është sakrifikuar për fëmijët dhe familjen.
Qofshin mallkuar kur arrijnë deri aty, që pasi rrahin barbarisht një fëmijë, në të njëjtin moment i bëjnë foto viktimës së pambrojtur për të reklamuar biznesin.” vijon më tej Duma.
Ajo paralajmëron se askush nuk do kalojë pa u ndëshkuar.
“Askush nuk do kalojë pa u ndëshkuar! Të prekshëm a të paprekshem do të paguajnë atë që po i shkaktojnë shqiptarëve çdo ditë!” përfundon reagimi i Grida Dumës.
