Gwyneth Paltrow akoma nuk e kupton arsyen se pse ajo njëherë është cilësuar si personi më i urryer në botën e showbiz-it. 3-vjet pasi revista “Star” e renditi të parën në klasifikimin e personave më të urryer në 2013, aktorja ka folur rreth këtij titulli të marrë gjatë një interviste të dhënë së fundmi.
“Në fillim kur e dëgjova këtë lajm, u habita se si mund të jem unë personi më i urryer se Chris Brown. Çfarë kam bërë?”- është shprehur Paltrow rreth kryesimit të kësaj liste, ku përfshiheshin gjithashtu personazhe të famshëm si Anne Hathaway, Madonna, Lindsay Lohan, Kristen Stewart dhe Brown.
Por drejtuesi i programit ka reaguar duke thënë se ndoshta ndonjëherë ajo i ka bërë njerëzit të ndihen keq. “Unë jam munduar të jem gjithmonë vetëvetja, të gjithë e dinë se kush jam. Më pëlqen të argëtohem, të ushqehem dhe ta vlerësoj jetën time. Por mendoj se ka disa gjëra tek mua që i bën njerëzit të nxjerrin konkluzione”. Ajo ka shtuar se ndoshta njerëzit nuk e pëlqejnë atë për shkakun se ka lindur në një familje të pasur me prindër të famshëm si Bruce Paltrow dhe Blythe Danner. Megjithatë ajo thekson se ka qënë puna e saj, ajo që e ka bërë atë personin që është sot.
