Brikena, një nga banoret e “Big Brother VIP 5”, ka hapur një diskutim të fortë brenda shtëpisë, teksa ka ndarë mendimet e saj për martesën, ndarjet dhe rolin e prindërimit. Gjatë një bisede me Gretën dhe Artanin, ajo u shpreh se e sheh veten të martuar me një burrë shqiptar, duke krahasuar mënyrën se si konceptohet familja në kultura të ndryshme.
Sipas Brikenës, në shumë raste vajzat e huaja marrin vendime të menjëhershme për t’u ndarë, pa u ndalur gjatë tek pasojat që kjo sjell, veçanërisht kur ka fëmijë. Ajo theksoi se për të, familja dhe stabiliteti i fëmijëve janë mbi gjithçka.
Banorja u ndal edhe tek situatat e konflikteve në çift, duke sqaruar se nuk po flet për dhunë, por për raste që, sipas saj, duhen trajtuar me maturi dhe përgjegjësi. Brikena u shpreh se ajo vetë nuk do të merrte një vendim ekstrem pa menduar më parë për ndikimin emocional tek fëmija.
“E di ku është problemi tek italianët dhe rracat e tjera, po marrim shembull se Tani martohet me një vajzë italiane. Varet prej rasteve se mund të jetë edhe vajza më e mirë në botë, akoma më e mirë se një vajzë shqiptare. Por problemi është se vajzat e huaja, bëjnë dy fëmijë, nesër ose pasnesër njeh një person tjetër dhe thotë ‘mbaroi dashuria, respekti’ dhe nuk i intereson a të la ty, a ka fëmijë apo jo. Ama një vajzë shqiptare, edhe nëse mbaron dashuria, qëndron për respekt të fëmijëve. Edhe i përballet çdo gjëje, edhe me pas ndonjë debat. Një shoqe e imja italiane e ka lënë të dashurin e saj pas 7 vitesh se ia ka futur një shpullë. Unë personalisht nuk jam dakord. Me qenë 7 vite me një person, me pas fëmijë dhe me u prishë për një shpullë¸ nuk e kisha prishur martesën për një shpullë. Nuk po them dhunë, se s’më ka lindur baba me më rrahur dikush. Por duhet menduar për fëmijën, për traumat e fëmijës, a mundet kjo gjë të rregullohet apo jo. Unë personalisht kisha vuajtur vetë, çfarë faji ka fëmija”, tha Brikena.
