Në epokën e trendeve të komplikuara të bukurisë, një stil i thjeshtë i Hailey Bieber po tërheq vëmendjen e rrjeteve sociale për një arsye shumë konkrete, realizohet në më pak se pesë sekonda. Modelja dhe sipërmarrësja amerikane ka rikthyer në fokus një model flokësh minimalist, i cili kombinon prakticitetin e përditshëm me një estetikë natyrale dhe femërore. Një formulë që fansat e modës e kanë përqafuar menjëherë.
Trendi u bë viral pasi Bieber publikoi në rrjetet sociale disa fotografi dhe video ku shfaqet me flokët gjysmë të kapura, ndërsa një tufë e lirë flokësh bie butësisht pranë fytyrës. Në vend që të stilojë flokët në mënyrë të ndërlikuar, ajo i mbledh lehtë pjesën e sipërme dhe e fikson me një kapëse të thjeshtë, duke lënë pjesën tjetër të flokëve të lirë. Rezultati është një pamje e butë, spontane dhe shumë elegante, që sipas ekspertëve të bukurisë përshtatet pothuajse me çdo formë fytyre.
Në të njëjtën kohë, Bieber tregoi edhe rutinën e saj të grimit pranveror në TikTok, ku aplikon fillimisht një blush në nuancë rozë mbi mollëzat dhe mbi hundë për një efekt natyral, më pas shton një ton më të theksuar në pjesën e sipërme të faqeve dhe përfundon me një kontur të lehtë buzësh në ton bezhë, të zbutur me majën e gishtit dhe një balsam me shkëlqim në një nuancë të ngrohtë. E gjithë pamja krijon atë që fansat e përshkruajnë si “efekti i frutave të pyllit”, një kombinim i butë mes ngjyrave rozë dhe një shkëlqimi natyral.
Megjithëse modeli i flokëve tërësisht të tërhequra mbrapa ka dominuar trendet e viteve të fundit, kjo qasje e re, më e lirshme dhe më spontane, duket se po fiton terren. Dhe ndoshta pikërisht ky është sekreti i suksesit, një stil që kërkon vetëm disa sekonda për t’u realizuar, por që arrin të krijojë një pamje të rafinuar, të freskët dhe tërësisht pranverore.
