Për shkak të gjendjes së jashtëzakonshme në vend, shumë emisione televizive janë anuluar duke ju lënë hapësirë edicioneve informative informuese. Mbi të gjitha emisionet argëtuese nuk trasmetohen duke respektuar dhimbjen e familjarëve që humbën të afërmit e tyre pas tërmetit. Ditën e sotme edhe Renato Mekolli ka lajmëruar se “Hell’s Kitchen” nuk do të transmetohet si çdo të premte dhe se ai bashkë me konkurentët do të gatuajnë për familjet në nevojë. Ai ka treguar se spektakli i gatimit do të shkëputet nga studiot e “Top Channel” për t’ju afruar realitetit. “Konkurentët së bashku me mua jemi bërë bashkë për një qëllim shumë më të madh: po gatuajmë që t’ju dërgojmë ushqime të ngrohta e shumë dashuri familjeve të dëmtuara nga tërmeti. Hell’s Kitchen do të zhvendoset sot nga studio Nova e Top Channel në realitetin e vërtetë, aty ku njerëzit sot kanë shumë nevojë jo vetëm për ushqim, por edhe për shumë mbështetje morale e shumë dashuri. Do të jemi aty sot dhe sa herë është e nevojshme ‘Kush ka mundësi vepron’ dhe sot më shumë se kurrë duhet të veprojmë”, ka shkruar Renato në ‘Instagram’.
https://www.instagram.com/p/B5c4wjUHKyM/?igshid=x89ewqrhe2sg
Ky gjest është pëlqyer shumë nga ndjekësit e Renatos, të cilët e kanë përgëzuar shefin e kuzhinës për vendimin që ka marrë.
