Ai ishte ende kërthinj kur endej sa në një sallë kumari në tjetrën nëpër qoshet e Udhevenit, Nju Jork, kur pak nga pak nisi të njihej me botën e errët dhe të ashpër të mafies amerikane. Megjithatë, do të duhej të mbushte 16 vjeç derisa disa të afërm të tij, gjithashtu pjesë e mafies, ta prezantonin “zyrtarisht” me bosët e vërtetë të familjes mafioze Gambino, Xhon Gotin e të birin, për llogari të të cilëve do të vriste e priste për një kohë të gjatë, do të pasurohej e më pas do të vuante edhe një dënim në një prej burgjeve më të rreptë të Brazilit, në famëkeqin Ari Franko… Sot, pas një jete mes krimit e pendesës, ai vjen për lexuesin shqiptar, në një rrëfim të rrallë, të sinqertë e të detajuar, SHQIPTARI I VETËM QË ARRITI TË DEPËRTONTE AQ THELLË NË ISH-MAFIEN AMERIKANE, JOHN ALITE, me një mesazh kuptimplotë për rininë e sotme: MOS E HUMBISNI LIRINË…
Ky është me pak fjalë përshkrimi për librin “Rregullat e Gotit: Historia e John Alites dhe rënia e mafies amerikane”, në profilin e Etleva Çepeles, kryeredaktores së shtëpisë botuese LIVING, e cila sjell për lexuesin shqiptar këtë libër. Por pse i hyri John Alite asaj bote të errët? Si arriti të bëhej krahu i djathtë i familjes më të fuqishme mafioze? Përse u shkëput më pas prej tyre? A janë të vërteta komentet që kanë mbushur portalet se arsyeja për lindjen e mosmarrëveshjeve ishte lidhja e tij e dashurisë me të bijën e bosit të tij, Victoria Gottin? Si është jeta e John Alites sot? Për të gjitha këto pyetje dhe shumë të tjera mbi botën e familjeve mafioze në Amerikë, ka një përgjigje në rrëfimin unik e të detajuar të John Alites në librin që ka rrëmbyer tanimë shumë lexues në Amerikë, por edhe në Shqipëri, për shkak se Alite ishte shqiptar.
