Trajneri i Paris Saint-Germain, Luis Enrique, u shfaq tepër emocional pasi tifozët e klubit francez i bënë një homazh prekës vajzës së tij të ndjerë, Xana, pas fitores madhështore në finalen e Ligës së Kampionëve.
PSG shkatërroi Interin me rezultatin 5-0 në Mynih, falë dopietës së Desire Doue dhe golave nga Achraf Hakimi, Khvicha Kvaratskhelia dhe zëvendësuesi Senny Mayulu – duke siguruar një tripletë historike për klubin parisien, që kishte fituar edhe kampionatin dhe kupën në Francë këtë sezon.
Pas ndeshjes, tifozët e PSG-së shpalosën një tifo emocionues në kujtim të Xanas, vajzës së Enrique, e cila humbi jetën në vitin 2019 në moshën 9-vjeçare për shkak të kancerit.
“Jam shumë i lumtur. Ishte një moment shumë emocional kur pashë pankartën nga tifozët për familjen time,” – tha Enrique pas finales.
“Por unë gjithmonë mendoj për vajzën time.”
Luis Enrique iu bashkua PSG-së në korrik të kaluar, duke ndërtuar një ekip të ri dhe të talentuar pas largimit të yllit Kylian Mbappe drejt Real Madridit.
Kjo ishte tripleta e dytë në karrierën e tij si trajner – e para erdhi në vitin 2015 kur fitoi Champions-in, La Liga-n dhe Kupën e Mbretit me Barcelonën. Simbolikisht, edhe atëherë, ai e festoi me vajzën e tij Xana në krah.
Për të festuar suksesin, Kulla Eiffel u ndriçua me ngjyrat kuqe e blu të PSG-së – klubi i dytë francez në histori që fiton këtë trofe, pas Marseille në vitin 1993.
“Që nga dita e parë kam thënë se dua të fitoj trofe të rëndësishëm, dhe Parisi kurrë nuk e kishte fituar Champions-in,” – tha Enrique.
“E bëmë për herë të parë. Është ndjesi fantastike të bësh kaq shumë njerëz të lumtur.”
Ai shtoi: “E mbajtëm presionin nën kontroll. Inter është një ekip i madh, por ne bëmë një ndeshje fantastike, sidomos në presionin ndaj tyre. Çdo lojtar u rrit këtë sezon, dhe po ashtu edhe skuadra si e tërë.”
