Ajo shpenzoi “vetëm” 1.3 milionë prej 4.653.333,02 dollarëve australianë (pak a shumë 3 milionë euro). Christiane Jiaxin Lee 21 vjeçe, studente e inxhinierisë kimike pati një “surprizë” të këndshme. Në llogarinë e saj bankare “Westpac” u hodh gabimisht një shumë prej 3 milionë eurosh. Vajza bëri si e habitur kur ditën e djeshme e arrestuan në aereoportin e Sidneit teksa po nisej për t’u vendosur në Malajzi.
LUKS I SHFRENUAR
Prej katër vitesh vajza jetonte në një luks të shfrenuar. Bënte blerje firmato, frekuentonte restorante prestigjioze dhe hotele me 5 yje. Christiane nuk e kishte lënë veten t’i mungonte asgjë, që kur një muaj para se të mbushte 18 vjeçe kishte hapur llogarinë e saj dhe kishte gjetur gabimisht një shumë stratosferike. Vetëm se në vend që të shkonte tek sporteli dhe të thoshte “më falni, kontrolloni pak se ka një gabim”, ajo kishte nisur të shpenzonte pafund. Vajza menjëherë ka marrë një pasaportë malajziane të re me justifikimin se e kishte humbur, dhe po përpiqej të largohej nga Australia ku jetonte prej 5 vitesh. Mirëpo gjithçka kishte rënë në gjurmët e policisë. Tani 21-vjeçarja do të dalë përpara gjykatës në Sidnei në muajin qershor.
