Një lajm tronditës ka ardhur nga Shtetet e Bashkuara që në orët e para të Vitit të Ri. Victoria Jones, vajza 34-vjeçare e aktorit legjendar dhe fituesit të çmimit “Oscar”, Tommy Lee Jones, ka ndërruar jetë në rrethana ende të paqarta.
Sipas mediave amerikane, ajo u gjet pa shenja jete në një hotel luksoz në San Francisko, ku po qëndronte. Ngjarja është raportuar të ketë ndodhur në orët e para të mëngjesit të 1 janarit, në katin e 14-të të hotelit “Fairmont”. Një prej mysafirëve të hotelit e ka vënë re fillimisht të shtrirë në korridor dhe ka njoftuar stafin, i cili më pas ka thirrur shërbimet emergjente.
Ekipet mjekësore kanë mbërritur rreth orës 02:52, por, fatkeqësisht, 34-vjeçarja është konstatuar pa ndjenja dhe pa shenja jete. Autoritetet kanë bërë të ditur se shkaku i vdekjes nuk është përcaktuar ende dhe se hetimet janë në vazhdim për të zbardhur plotësisht rrethanat.
Burime zyrtare kanë sqaruar se deri në këtë fazë nuk janë evidentuar shenja dhune apo elementë që të çojnë drejt një piste të caktuar, duke lënë të hapura të gjitha mundësitë deri në përfundimin e ekzaminimeve mjeko-ligjore.
Victoria Jones kishte pasur disa angazhime të hershme në aktrim dhe ishte shfaqur herë pas here krah të atit në evente të rëndësishme të industrisë së filmit, nga premierat në New York deri te tapetet e kuq në Los Angeles. Më shumë detaje pritet të bëhen publike në ditët në vijim.
