Homazhe në TVSH, trupi i Andrea Stefanit mbërrin të martën në Tiranë

Trupi i pajetë i publicistit të ndjerë Andrea Stefani pritet të mbërrijë në Tiranë ditën e të martë. Për të gjithë ata që do të duan të shprehin ngushëllimet e rastit, trupi do vendoset shkurtazi për homazhe në ambjentet e TVSH përpara se të përcillet në banesën e fundit shkruan Dita. Analisti i njohur Andrea Stefani u nda nga jeta ditën e djeshme, teksa vuante prej disa muajsh nga një sëmundje e rëndë. Ai ishte prekur nga një tumor në stomak. Për fat të keq, kimioterapia nuk dha efektet e pritshme. Ndërhyrja kirurgjikale rezultoi fatale. Kolegu ynë është shuar të shtunën pasdite në një spital në Romë. Ai nuk dëshironte që sëmundja e tij të bëhej publike dhe vazhdimisht qetësonte ata pak miq që e dinin duke u thënë që ishte diçka e lehtë që po kalonte dhe se kurimi po ecte mirë. Andrea pas pak ditësh festonte 58 vjetorin. Ai ka lindur në 8 dhjetor të vitit 1958. Andrea la pas bashkëshorten e tij Enkeleden dhe dy fëmijë, Danielin 15 vjeç dhe Stefaninë 12 vjeçe./panorama