Ishte viti 1995 kur ajo u shpall më e bukura e Shqipërisë. Ky titull duket se i hapi shumë dyer Hygerta Sakos, tashmë prezantuese e emisioneve sportive dhe me një eksperiencë disavjeçare.
Në disa prej intervistave të saj ish-Miss Albania ka pranuar se bukuria e ka ndihmuar të realizojë objektivat që ajo ka pasur për të qenë pjesë e televizionit, por sigurisht që atë e konsideron si një ambalazh të aftësive të tjera që ajo ka.
Në një intervistë për ‘Panorama Plus’ ndër të tjera Hygerta është shprehur se ndihet më e bukur tani sesa kur ishte më e re.
‘Të tregohem e sinqertë mua më pëlqen më shumë vetja tani sesa kur kam qenë e re. Duke qenë se për mua bukuria është thjeshtë një ambalazh i këndshëm i aftësive të tjera që vlejnë shumë më shumë, ndihem çdo ditë e më e sigurt për atë që përfaqësoj. Bukuria nuk njeh moshë, për sa kohë njerëzit të vlerësojnë edhe për ato vlera të tjera që ke dhe që sigurisht nuk abuzon me bukurinë që të ka falur zoti’- ka thënë Sako.
Nga ana tjetër prezantuesja ka zbuluar sesi ka arritur të heq 10 kilogramë për një vit, pasi siç shprehet ajo e shijon shumë ushqimin dhe merr peshë shumë shpejt.
‘Kam gati një vit që pak nga pak me durim ushqehem me kujdes e me ushqime të shëndetshme, që i bëjnë mirë organizmit tim. Ecja në këmbë nga liqeni më ka ndihmuar shumë’- ka treguar Hygerta./revistawho.com
