Entuziazmi i fansave të Harry Styles për turneun e ri “Together Together” u kthye shpejt në zhgënjim dhe zemërim, pasi u zbuluan çmimet e larta të biletave.
Në rrjetet sociale, këngëtari 31-vjeçar po përballet me një valë kritikash, ku shumë ndjekës e kanë cilësuar situatën si “të babëzitur” dhe “jashtë realitetit”. Styles pritet të mbajë 58 koncerte në kuadër të turneut, përfshirë 10 shfaqje të mëdha në stadiumin Wembley në Londër. Megjithatë, me nisjen e para-shitjeve, shumë fansa u përballën me kosto dukshëm më të larta krahasuar me turneun e tij të mëparshëm “Love On Tour”, i cili përfundoi në vitin 2023.
Në Londër, çmimet e biletave në tribunë variojnë nga rreth 44 deri në 642 dollarë, ndërsa biletat për vendet në këmbë kushtojnë nga 199 deri në 385 dollarë. Paketat VIP arrijnë edhe më lart, duke nisur nga 646 dollarë dhe duke shkuar deri në rreth 1,000 dollarë.
Situata paraqitet e ngjashme edhe në Shtetet e Bashkuara. Për koncertet në Madison Square Garden në Nju Jork, fansat që prisnin online u njoftuan se çmimet paraprake varionin nga 50 deri në 1,182.40 dollarë, përfshirë tarifat e shërbimit. Sipas raportimeve, paketa më e shtrenjtë VIP arrin në 1,667 dollarë. Ndërkohë, në Amsterdam, biletat shiten nga 74.05 euro deri në 828.62 euro.
Krahasimi me vitin 2022 e bën reagimin edhe më të fortë. Atëherë, një biletë për koncertin e Styles në Madison Square Garden kushtonte nga 39.50 deri në 199.50 dollarë, ndërsa shfaqjet e tij në Wembley varionin nga 45 deri në 99 paund. Rritja e ndjeshme e çmimeve ka bërë që shumë fansa ta konsiderojnë muzikën e tij “të paarritshme”, veçanërisht për publikun e ri.
Rrjeti social X u mbush me komente kritike.
“Kjo është përvoja më e keqe e para-shitjes që kam pasur ndonjëherë. Mendova se kisha një shans ta shihja Harry-n, por biletat u zhdukën për 30 minuta”, shkruan një përdorues.
Një tjetër shton: “Jam pa fjalë sa i shkëputur nga realiteti je bërë ti dhe ekipi yt. Muzika duhet të jetë për të gjithë.”
Edhe pse shumë fansa theksojnë se vazhdojnë ta duan dhe ta mbështesin artistin, ata pranojnë se çmimet aktuale po i detyrojnë të heqin dorë nga koncertet, duke hapur një debat të fortë mbi kufirin mes suksesit dhe përfitimit të tepruar në industrinë e muzikës.
