Debati familjar që lidhet me banorin e “Big Brother VIP Albania”, Mal Retkocerin, ka dalë përtej mureve të shtëpisë më të famshme në Shqipëri. Së fundmi, babai i tij ka vendosur të flasë publikisht, duke bërë deklarata të forta për raportin e ndërprerë prej vitesh me djalin dhe ish-bashkëshorten, këngëtaren Violetë Kukaj.
Në fjalën e tij, ai shprehet se mungesa e komunikimit nuk ka qenë zgjedhje e tij, por një situatë e krijuar ndër vite, ku – sipas tij – ndikimi i nënës ka qenë vendimtar në largimin e fëmijëve.
“Kam tentuar të komunikoj me ta përmes disa personave të njohur, personaliteteve të Shqipërisë dhe Kosovës. Me Violetën fillimisht, sepse ajo nuk donte as të më fliste në telefon dhe as të më takonte,” shprehet ai.
Babai i Malit thekson se është përpjekur vazhdimisht të ndërtojë ura komunikimi, jo vetëm drejtpërdrejt, por edhe përmes ndërmjetësve publikë, por pa rezultat. Sipas tij, distanca emocionale është thelluar me kalimin e viteve.
Në deklaratat e tij më të forta, ai ndalet edhe te marrëdhënia me Violetë Kukajn, duke pretenduar se ka qenë një faktor kyç në karrierën e saj artistike.
“Unë e kam bërë yll. Kur e kam marrë për nuse, ajo kishte vetëm një këngë të incizuar. Unë ia kam incizuar mbi 300 këngë, me ajkën e Kosovës dhe Shqipërisë,” deklaron ai.
Ai shton se, sipas tij, Violetë Kukaj është trajtuar gjithmonë me respekt dhe dinjitet në familjen e tij, duke e përshkruar veten si mbështetës të vazhdueshëm, si në aspektin familjar ashtu edhe profesional.
“Nana ka ndikuar shumë te fëmijët. Ai është djalë i mirë, shumë i talentuar, i ka ngjarë babës. Edhe Violetën e kam bërë unë yll,” vijon ai.
Në fund, mes toneve të ashpra, ai shpreh edhe dëshirën për pajtim dhe ribashkim familjar, duke theksuar se është i hapur për dialog në çdo moment.
“Unë asaj i them: kthehu jetës së mbarë, kthehu realitetit, rehatllëkut. Ajo është trajtuar në familjen tonë si mbretëreshë. Unë dua që familja të bashkohet dhe jam i gatshëm në çdo kohë.”
Nga ana tjetër, vetë Mali ka shprehur më herët publikisht dhimbjen për distancën e gjatë me të atin, por ka refuzuar kategorikisht një përballje mediatike, duke theksuar se këtë çështje dëshiron ta mbajë larg kamerave.
