Aktorja Francia Raisa, e cila në vitin 2017 i dhuroi një veshkë Selena Gomez duke i shpëtuar jetën, ka reaguar publikisht pas lajmeve se nuk ishte e ftuar në dasmën e këngëtares me producentin Benny Blanco.
Në një intervistë të fundit, 37-vjeçarja vendosi t’i japë fund zërave për përçarje mes tyre, duke i quajtur ato “thashetheme”.
“Jam shumë e lumtur për të. Dhe shikoni… ajo ka një jetë dhe është tashmë miliardere! Jam mirënjohëse që munda ta bëja këtë për të”, u shpreh Francia me një buzëqeshje të qetë, duke nënvizuar se mes tyre nuk ka armiqësi.
Aktorja shtoi se për të, akti i dhurimit të një organi nuk lidhet me pritshmëri apo detyrime emocionale, por me një ndjenjë të thellë njerëzore.
“Është një donacion dhe është diçka e mirë që arrita ta bëj,” – tha ajo, duke kujtuar periudhën kur Selena po përballej me komplikimet e lupusit.
“Jam mirënjohëse që jam gjallë dhe mund të them se kam shpëtuar një jetë,” shtoi ajo me emocion.
Francia theksoi gjithashtu se për gratë, procesi i dhurimit të organeve mund të jetë “më i vështirë” sesa për burrat, megjithëse nuk dha detaje se çfarë qëndron pas kësaj diference.
Edhe pse nuk mori pjesë në dasmën e bujshme të Gomez, aktorja duket se ka zgjedhur paqen dhe mirënjohjen ndaj një lidhjeje që, ndonëse e trazuar nga thashethemet, ka qenë një nga aktet më fisnike të miqësisë në showbiz.
