Në një intervistë të fundit, aktorja Arjola Demiri ndau mendimet e saj mbi ndikimin e “Big Brother VIP” tek ish-konkurrentët, duke u ndalur veçanërisht te Beatrix Ramosaj dhe sfidat me të cilat ajo është përballur pas daljes nga formati.
E ftuar në “N’krejt debat”, Demiri foli për mënyrën se si fama e fituar në një reality show mund të jetë e përkohshme dhe të vijë me pasoja të papritura.
“Populli pas daljes nga Big Brother, sado që të ka dashur, e zbeh dashurinë që ka për ty vetëm për faktin që të njeh mirë në të gjitha anët e tua, të mira, të errëta, negative, më pozitive. Fillojnë e zbehin interesin për ty”, tha ajo.
Duke folur për rrugëtimin e disa ish-konkurrentëve, ajo përmendi Fifin, duke thënë: “Duhet ndoshta punë, mund që ta mbash këtë famën prapa Big Brother. Mendoj që Fifit i kanë ardhur shumë gjëra për një herë, ka qenë njohja me burrin e vet, lidhja e djalit. Sado që talentin e ka, mendoj që ndoshta i duhet një kohë për të arritur aty ku ishte.”
Por një nga pikat më të forta të bisedës ishte ndikimi i reality show-t tek Beatrix Ramosaj, e cila pas eksperiencës së saj në “BBV” u përball me një presion të madh publik.
“Trixa është një njeri shumë i ndjeshëm. Duke marrë parasysh se nëna e ka rritur si lule mos më prek. Me thënë të vërtetën. E gjithë ajo trysni, ai presion, akuzat, komentuesit, njerëzit që e bombarduan Trixën në një mënyrë të frikshme saqë i kanë thyer xhamat e makinës, kanë shpuar gomat, mendoj që deri diku ka qenë shumë e padrejtë,” tha Demiri.
Ajo shtoi se agresiviteti i publikut dhe trysnia e vazhdueshme mund të kenë qenë faktorë vendimtarë që e shtynë Ramosajn të largohej nga Shqipëria: “Komentuesit dhe njerëzit kanë qenë jashtëzakonisht agresivë. Mendoj që një nga arsyet kryesore për të lënë Shqipërinë e për të ikur në Amerikë ka qenë kjo trysni e frikshme ndaj Trixës, familjes së Trixës, e gjithë rrethit të saj.”
