Gruaja e një prej lojtarëve që vdiqën në Kolumbi pas aksidentit tragjik, ka rrëfyer dje momentin e vështirë kur i ka treguar të bijës se i ati i saj nuk jeton më. Valdecia Paiva, 25-vjeçe dhe dy vajzat e saj po përgatiteshin për t’u transferuar në shtëpinë e tyre të re, gjë që do të ndodhte një ditë pas aksidentit. Por pasi zbuloi se burri i saj, mesfushori Gil ishte një nga 72 personat që humbën jetën, asaj iu desh të gjente një mënyrë për t’ia treguar vajzës së saj Gabrielës lajmin më të keq të jetës. “Unë isha e shokuar për vete, por e dija që duhej t’ia thoja Gabrielës sa më
shpejt të ishte e mundur”, tha Valdecia, transmeton JetaOshQejf. “Kërkova ndihmë nga një psikolog i klubit dhe u ulëm bashkë. Ishte gjëja më e vështirë për mua. Kisha dy shqetësime: doja që ajo të mos traumatizohej për fluturimet me avion dhe të mos e urrente Zotin që i mori të atin. Ne jemi të krishterë dhe duam që fëmijët tanë të rriten duke e dashur Zotin. Fillova t’i flas për të atin dhe për udhëtimin që kishte bërë. I thashë se i ati është aksidentuar dhe ishte lënduar jashtëzakonisht shumë, doja ta lija që të kuptonte vetë të vërtetën e dhimbshme. I thashë që babai i saj ka shkuar në Parajsë, aty ku kujdeset për ne dhe që është shumë i lumtur, por nuk mund të kthehet më kurrë tek ne. Ajo filloi të qajë, më vështroi dhe qante dhe qante duke pyetur “a ka vdekur babi im, mami?” Unë qava me të dhe i thashë “dashuri, edhe mami po vuan, është shumë e vështirë për mua. Tani ne jemi bashkë, tani jemi ne të treja. Duhet të bëhemi të forta për të kaluar”. Gruaja rrëfen se ka lënë vetëm një foto në shtëpi, të çiftit dhe dy vajzave 4 dhe 2 vjeçare, të cilët kishin dalë të lumtur. Ajo shton se i kishte hequr të gjitha kujtimet dhe fotot e tjera sepse nuk donte të stresonte vajzën e saj. “Unë do t’u flas çdo ditë vajzave të mia për të atin, do u tregoj atyre se kishin një baba të mrekullueshëm, të përkushtuar dhe shumë të dashur i cili donte t’i përqafonte të bijat gjatë gjithë kohës, kishte gjithmonë kohë për to dhe donte gjithnjë të ishte me to”, tha Vali e cila të premten do të festonte përvjetorin e 7- të të martesës me lojtarin, i cili ndërroi jetë në aksidentin tragjik.
