Gjatë ditës së sotme, gazeta “Panorama Online”, publikoi lajmin e largimit nga “Pasdite në Top Channel” të autores dhe moderatores së programit, Jonida Shehu. Në një prononcim për “Panoramën” gazetarja u shpreh: “Jam larguar që të premten. U ndjeva e papërshtatshme për të vazhduar punën aty. Ky vendim është i pakthyeshëm”.
Nga ana tjetër, “Top Channel” përmes një artikulli në faqen zyrtare bën me dije se vendin e Jonida Shehut në fashën orare të pasdites do ta zërë Juli Krisafi, spikerja e edicioneve qendrore të Top Channel prej disa vitesh, e cila nga sot do të jetë moderatorja e re e programit të pasdites.
Nga “Top Channel” njoftohet se marrëdhëniet kontraktuale me znj.Jonida Shehu janë ndërprerë në mënyrë përfundimtare më 23.10.2017. Siç raporton “TCH”, sjellja aspak profesionale e Jonida Shehut dhe braktisja e emisionit në mënyrë të papritur janë arsyet e largimit të gazetares nga “Top Channel”.
Për këtë arsye, zyra ligjore do të ndërmarrë rrugët ligjore në raport me të, duke shtuar pas qëndrimit të saj në media edhe kërkesën për dëmshpërbim për prishje të imazhit.
Juli Krisafi është një gazetare me një eksperiencë të gjatë në televizion, ndërkohë që prej disa vitesh ajo është kthyer si imazh i edicionit qëndror të lajmeve. Juli Krisafi do të jetë edhe bashkëautore e programit “Pasdite në Top Channel”. / revistawho.com
