Plazhet e mbushura me diell të Tenerife-s u kthyen ditën e djeshme në skenë revolte, ndërsa qindra protestues të zemëruar kundër turizmit masiv pushtuan bregdetin e njohur të Troya Beach.
Duke brohoritur slogane si “Më shumë turistë, më shumë mjerim!” dhe “Ishujt Kanarie nuk janë për shitje!”, demonstruesit shqetësuan pushuesit që gjendeshin të shtrirë në peshqirët e tyre, të cilët shihnin të hutuar dhe të frikësuar skenën e pazakontë.
Shumë nga pushuesit, të cilët ishin aty për një ditë relaksi, u gjetën të rrethuar nga turmat protestuese, ndërsa disa prej tyre u larguan me nxitim nga plazhi.
Ky nuk është incidenti i parë i këtij lloji. Protesta të ngjashme kanë shpërthyer gjatë gjithë verës në Spanjë, sidomos në destinacionet turistike kryesore si Ishujt Kanarie dhe Balearic. Demonstruesit kërkojnë një rregullim të modelit të turizmit masiv, duke propozuar taksa për turistët dhe kufizime për ndërtimin e hoteleve.
Megjithëse nuk pati raportime për dhunë, tensioni ishte i lartë. Pankartat që mbanin demonstruesit, të shkruara në gjuhë të ndryshme, përfshinin mesazhe të drejtpërdrejta si “Turistët, shkoni në shtëpi!” dhe “Kanaret nuk jetojnë nga turizmi, turizmi jeton nga Kanaret.”.
Organizatorët e protestës paralajmërojnë se këto demonstrata nuk do të ndalen derisa të merren masa konkrete për të mbrojtur interesat e komuniteteve lokale dhe mjedisin.
