Në Paris, nën siluetën e Kullës Eiffel dhe në ditën më simbolike të dashurisë, Ilary Blasi ka zgjedhur të hapë një kapitull të ri. Pas ndarjes së bujshme me Francesco Totti-n, moderatorja italiane, ka pranuar propozimin për martesë nga partneri i saj, sipërmarrësi gjerman Bastian Müller. Në një video të publikuar në Instagram, ajo shfaqet e emocionuar, me unazën në plan të parë dhe me mbishkrimin domethënës, “My Forever Valentine”. Një deklaratë që vulos një histori dashurie të jetuar tashmë hapur.
Propozimi, sipas raportimeve, erdhi pikërisht në Paris, në një skenë që duket si e shkëputur nga një film romantik. Këtë herë, ndryshe nga unazat e mëparshme që kishin ndezur aludime, gjesti ishte i qartë, publik dhe i pakthyeshëm. Një diamant i ri në gisht dhe një buzëqeshje që nuk lë vend për dyshime, Ilary është gati për martesën e dytë.
Thënia e saj e dikurshme, “Thonë që e dyta është edhe më e bukur”, në dokumentarin “Unica”, sot tingëllon si një profeci personale. Ndërkohë që procesi i divorcit me Tottin vijon në gjykatë, Blasi ka zgjedhur të mos mbetet në të shkuarën. Ajo dhe ish-kapiteni i Romës po përpiqen të rindërtojnë jetët e tyre veçmas, larg zhurmës së përplasjeve ligjore.
Në showbiz-in italian, ku ndarjet shpesh bëhen plagë publike, Ilary Blasi po dëshmon se dashuria mund të rilindë më e pjekur, më e qetë dhe, ndoshta, siç thotë vetë ajo, “më e bukur se e para”.
