Disa orë më parë, Ilva Tare ka zyrtarizuar largimin nga televizioni “Ora News”. Pas 8 vitesh në median e njohur, gazetarja ka shkruar disa rreshta dedikuar bashkëpunimit të këtyre viteve dhe mbështetjes nga ana e drejtuesve dhe stafit. Në fund Ilva thekson se largimi është pranuar nga të dyja palët dhe se do të mbeten dashamirës të sukseseve të njëri-tjetrit.
“Pas 8 viteve angazhimi e përkushtimi në televizionin më të besueshëm informativ, Ora News, me emisionin Tonight Ilva Tare dhe drejtimin e departamentit të Informacionit, rrugëtimi profesional me këtë televizion do të pasohet me mbresat e pashlyeshme të një bashkëpunimi dhe arritjeve të shkëlqyera.
Në muajt e ardhshëm do të jem e angazhuar me projekte dhe ambicje të reja profesionale, për të cilat e them pa frikë se udhëzuesi më i mirë do të jetë eksperienca e këtyre viteve.
E vlerësoj shumë mundësinë e të punuarit me çdo gazetar, redaktor, teknik për bashkëpunimin e suksesshëm si dhe lirinë e ofruar, për të dhënë më të mirën në shërbim të së vërtetës dhe të publikut shqiptar.
Ora News është tashmë një ekran i pamungueshëm në familjet shqiptare dhe lajmet e programet cilësore me shikueshmëri të lartë, janë një bilanc motivues për suksese edhe më të mëdha profesionale. Së bashku me Presidentin e Yldon Media Group, Ylli Ndroqi dhe drejtuesit e Ora News kemi vendosur të mbetemi dashamirës të sukseseve televizive që na rezervon e ardhmja”,-ka mbyllur fjalën Ilva.
https://www.instagram.com/p/Bnbi7olhScC/?utm_source=ig_share_sheet&igshid=i2dlwmm3p9ao
Kujtojmë se sezoni i ri sipas fjalëve që qarkullojnë do e gjejë gazetaren në departamentin e lajmeve në televizionin që do të prezantohet së shpejti për publikun, “A1”. Ajo do të qëndrojë në krye të departamentit të lajmeve me një format tërësisht të ri./revistawho.com
