Inis Gjoni dhe Romir Zalla, tri netë shfaqje në Tiranë 

“Mbroni Shpellarin”, shfaqja me regji të Inis Gjonit dhe me aktor Romir Zallën, zbret sot (12), nesër (13) dhe pasnesër (14) në Teatrin e Metropolit. Pas suksesit në Tiranë dhe në qytetet Elbasan, Fier e Durrës, shfaqja ndalon sërish në kryeqytet pas kërkesave të shumta nga artdashësit, për të vazhduar sërish me turin mbarëshqiptar, në qytete si Tetova, ku interesi ka qenë i madh. “Mbroni Shpellarin” është një monokomedi fantastike, e shkruar nga Rob Beiker, aktor dhe regjisor. “Për të shkruar këtë vepër atij i janë dashur 3 vjet, por edhe të studiojë antropologji, mitologji, parahistori e psikologji. Eshtë vënë për herë të parë në skenë në vitin 1991, dhe që nga vënia e parë ka njohur një sukses të jashtëzakonshëm në botë. Jo më kot është më jetëgjata në historinë e Broduej pasi vetë Rob Beiker e ka luajtur për 700 netë me rradhë. Eshtë përkthyer në gjuhë të ndryshme dhe është luajtur në më tepër se 50 shtete e aktualisht luhet në shumë vende parelelisht. ”Mbroni shpellarin“ është bërë tashmë një hit botëror, e përkthyer në shqip nga Artur Lenja”, ka thënë regjisorja Gjoni.