Sopranoja shqiptare me famë botërore, Inva Mula, ishte e ftuar së fundmi në emisionin “Goca dhe Gra”, ku ndau disa momente kyçe nga jeta e saj profesionale dhe personale. Mes shumë rrëfimeve, ajo foli edhe për eksperiencën në filmin e njohur “The Fifth Element” dhe zbuloi një detaj që pak e dinin: nuk ka përfituar financiarisht nga ky projekt, për shkak të një gabimi në kontratë.
“Sa të paguan? Se Hollywood-i…”, e pyeti njëra prej moderatoreve, duke nënkuptuar pritshmëritë e mëdha që zakonisht lidhen me projektet hollivudiane.
Por përgjigjja e Inva Mulës ishte befasuese:
“Në fakt ishte gabim jetësor. Unë shkova me agjentin tim, një njeri me shumë eksperiencë, por edhe ai gaboi. Nga entuziazmi ai harroi të firmoste të drejtat e autorit.”
Në vijim, sopranoja tha se prej asaj kohe nuk ka marrë asnjë të ardhur nga filmi:
“Jo! Është me miliona, por i kam thënë vetes që s’ka gjë, pasi fitova përjetësisht administrimin e publikun. Edhe milionat nuk më interesojnë, më interesojnë njerëzit që kanë parë shfaqjen. Po të kisha milionat nuk e di nëse do të më interesonte të këndoja më apo jo.”
Rrëfimi i saj është një kujtesë se, ndonjëherë, vlerat shpirtërore dhe ndikimi tek publiku janë më të rëndësishme se përfitimet materiale – edhe kur bëhet fjalë për skenat më të mëdha të botës.
