Anaid Kaloti, fituesi i edicionit të gjashtë të ‘Big Brother’, ditën e sotme ishte i ftuar në emisionin ‘Pop Culture’. Ish- banori ka folur rreth eksperiencës në ‘reality show’-n dhe marrëdhënien me ish të dashurat e tij. Anaidi e ka pranuar se ‘Big Brother’ i ka dhënë shumë famë dhe e ka ndihmuar në profesionin që ka zgjedhur në jetë, gazetari. Gjithashtu ai ka treguar se është një ndjekës i rregullt i të gjithë edicioneve të ‘Big Brother’ dhe ka pasur dhe disa banorë të preferuar. “Çdo edicion të Big Brother e kam ndjekur dhe sigurisht që kam pasur edhe preferencat e mia. Edicionin e kaluar kam krijuar simpati për Olsin.”
Duke qenë se Anaidi është përfolur shumë për marrëdhëniet e tij me vajza të ndryshme, nuk mund të anashkalohej një pyetje në lidhje me këtë temë nga moderatorët e ‘Pop Culture’. “Kam qenë i lidhur për dy vite por tashmë ka përfunduar. Unë jam tip që nuk kompleksohem nga jeta e ish të dashurave. Kur diçka mbaron për mua quhet e ezauruar dhe nuk i kthehem më. Unë besoj se shoqëria pas një marrëdhënie dashurie mund të funksionojë, të paktën mua më ka funksionuar me disa nga ish të dashurat e mia”, është shprehur Anaidi. /revistawho.com
