Drama që ka përfshirë familjen Beckham po merr një kthesë të re, këtë herë nga një figurë e papritur. Në mes të përplasjes publike mes Brooklyn Beckham dhe prindërve të tij, David dhe Victoria Beckham, ka ndërhyrë edhe ish-parukieri i Nicola Peltz, duke hedhur dritë mbi një këndvështrim krejt ndryshe nga ai që ka dominuar deri tani.
Justin Anderson, i cili ka punuar me Nicola Peltz në vitin 2014 gjatë promovimit të filmit “Transformers: Age of Extinction”, ka reaguar publikisht në Instagram. Ai nuk kurseu aspak fjalët, duke e cilësuar aktoren si “një nga njerëzit e famshëm më të këqij” me të cilët ka bashkëpunuar ndonjëherë. Sipas tij, ajo është një “mollë të kalbur”, duke lënë të kuptohet se burimi i problemeve nuk është familja Beckham, por vetë Nicola.
Në një reagim të mëvonshëm, Anderson shkoi edhe më tej, duke shkruar: “E dija që kjo martesë nuk do t’i bënte mirë asaj familjeje,” ndërsa shtoi se që në fillim kishte ndjerë “energji të keqe”. “Kur dikush nuk është i sjellshëm, kjo del gjithmonë në pah. Nuk mund ta fshehësh,” theksoi ai.
Këto deklarata vijnë vetëm disa ditë pas postimit tronditës të Brooklyn Beckham në Instagram, ku ai sulmoi drejtpërdrejt prindërit e tij. Brooklyn i akuzoi ata për “gënjeshtra të panumërta” dhe për tentativa të vazhdueshme për të “shkatërruar martesën” e tij me Nicola Peltz. Në mesazhin e gjatë, ai u shpreh qartë se nuk synon pajtim dhe se, për herë të parë, po zgjedh të mbrojë veten.
Ndërhyrja e ish-parukierit vetëm sa i hedh më shumë benzinë zjarrit një historie që tashmë ka kaluar kufijtë e një konflikti familjar, duke u shndërruar në një dramë publike me shumë zëra, akuza dhe pozicionime të forta. Tensioni mes palëve duket larg zbutjes – përkundrazi, çdo reagim i ri e bën përçarjen edhe më të thellë.
