Këngëtarja e njohur shqiptare, Rozana Radi, ka ndarë një histori të vështirë personale në emisionin “Goca dhe Gra”, ku ka treguar për përndjekjen e vazhdueshme që ka përjetuar nga një person që e ndiqte kudo.
Rozana rrëfeu se gjithçka nisi para disa vitesh, kur një djalë filloi ta ndiqte në mënyrë obsesive, duke u shfaqur kudo ku ajo shkonte. “Një ditë sa hapa ashensorin, e gjeta aty. Nuk e besoja dot se çfarë po ndodhte,” – tha ajo, duke shtuar se ndjesia e pasigurisë i kishte kthyer ditët në ankth.
Pas kallëzimit të parë që bëri në polici, personi u arrestua dhe u dënua me një vit burg. Megjithatë, sapo u lirua, përndjekja nisi sërish. “Sapo doli nga burgu, filloi përsëri. Duhej ta kaloja të njëjtën frikë, të njëjtën ndjenjë që po më vëzhgon çdo hap,” shtoi ajo.
Këngëtarja u detyrua të bëjë një kallëzim të dytë, pas të cilit personi u arrestua sërish. “Falë policisë që më është gjendur pranë, sot ndihem pak më e qetë,” u shpreh ajo me mirënjohje për organet e rendit.
Rozana shtoi se për një kohë të gjatë kishte jetuar në frikë të vazhdueshme:
“Fillova të mos jetoja… shikoja në çdo moment mos e kisha pas. Pyeta nëse mund të mbaja ndonjë sprej për vetëmbrojtje, por më thanë se është e palejueshme.”
Sipas saj, pas lirimit të fundit nga burgu, i njëjti person është vënë sërish nën hetim pasi ka përndjekur një tjetër grua, një juriste.
