Në mesin e qindra objekteve personale që tregojnë historinë e jetës së Princeshës Diana, një letër e rrallë dhe tejet personale po tërheq vëmendjen e publikut. Letra është shkruar me dorë nga Diana vetëm dy ditë pas dasmës së saj me Princin Charles dhe për herë të parë është bërë publike në kuadër të një ankandi të veçantë.
Julien’s Auctions ka përgatitur një koleksion të madh me më shumë se 300 artikuj të titulluar “Stili i Princeshës Diana dhe një Koleksion Mbretëror”, që do të dalin në ankand më 26 qershor në The Peninsula Beverly Hills. Midis fustaneve, këpucëve dhe sendeve ikonike të princeshës së ndjerë, gjendet edhe kjo letër intime e dërguar Mark Simpson-it, një punonjës i Pallatit Buckingham.
Letra është datuar më 31 korrik 1981, menjëherë pas dasmës madhështore dhe zhvendosjes së saj në pallat. Martin Nolan, bashkëthemelues dhe drejtor ekzekutiv i Julien’s Auctions, e cilëson këtë si një nga pjesët më të veçanta të koleksionit.
“Kjo është një nga veprat e mia të preferuara,” – thotë Nolan për PEOPLE.
“Është disa ditë pas dasmës së saj. Ajo jetonte në Pallatin e Buckinghamit dhe ishte periudha kur po përshtatej nga jeta e saj normale në jetën e pallatit.”
Sipas Nolan, Diana ishte në proces mësimi të rregullave mbretërore nga vetë Mbretëresha, si për shembull përkulja sipas protokollit. Por ndërkohë, ajo gjeti një pikë të vogël ngushëllimi në raportin miqësor me Mark Simpsonin.
“Ata ishin pothuajse në të njëjtën moshë, ai ishte pak më i madh se ajo,” – shton Nolan.
“Në letër ajo flet për sa e vetmuar ishte kur ishte në pallat.”
Letra nuk është thjesht një copë letre, por një dritare e rrallë në botën e brendshme të Dianës – një grua e re e mbyllur pas mureve të arta, duke luftuar vetminë në një botë që në dukje i kishte të gjitha.
